பீரியட் பிலிம் எடுக்க இங்கிலாந்திலிருந்து ஏமி ஜாக்சன்

பீரியட் பிலிம் எடுக்க ஒரு தில் வேண்டும். அது இயக்குனருக்கும் மட்டும் இருந்தால் போதாது. பணம் போடுகிற தயாரிப்பாளருக்கும் வேண்டும். மதராசப்பட்டினம் படத்தில் இருவருக்குமே அந்த தில் இருப்பது ஒவ்வொரு அசைவிலும் தெரிய வைத்திருக்கிறார்கள். ஆடியோ வெளியீட்டு விழா அழைப்பிதழில் துவங்கி, விழா வரைக்கும் மிரட்டலோ மிரட்டல்!

தனது டீமோடு பத்திரிகையாளர்களை சந்தித்த படத்தின் இயக்குனர் விஜய், மதராசப்பட்டினம் வளர்ந்த கதையை சொல்ல சொல்ல பிரமிப்பு. 1940 களில் சென்னை எப்படியிருந்தது? படத்தின் மிக முக்கியமான களம் இது. இதற்காக ஆர்ட் டைரக்டர் செல்வகுமாரிடம் சொல்லி பிரமாண்டமான செட்டுகளை போட்டாராம். கேளம்பாக்கத்தில் ஒரு பெரிய இடத்தையே வளைத்துப் போட்டு சென்ட்ரல் ரயில்வே ஸ்டேஷனையும், மவுண்ட்ரோடையும் உருவாக்கினாராம். அவ்வளவு ஏன்? இப்போது கூவம் என்று சொல்லப்படுகிற பக்கிங்காம் கால்வாயை கூட உருவாக்கியிருக்கிறார்கள் என்றால் பிரமித்துக் கொள்ளுங்களேன்!

முதலில் இந்த கதையை விஜய் எங்கிட்ட சொன்னார். கேட்டவுடனேயே பிடிச்சிருந்தாலும், ஆகிற செலவு என் படங்களுக்கான வியாபாரத்தை விட ஐந்து மடங்கு அதிகமாக இருந்திச்சு. இருந்தாலும் கல்பாத்தி அகோரத்திடம் இந்த கதையை கேளுங்க என்றேன். கேட்டவுடன் பட்ஜெட்டை கவலைப்படாதீங்க. பார்த்துக்கலாம் என்றார். அவரு இல்லேன்னா இந்த படம் இல்லை என்றார் ஆர்யா. சலவை தொழிலாளியாக இப்படத்தில் நடித்திருக்கிறார் இவர்.

இங்கிலாந்திலிருந்து ஏமி ஜாக்சன் என்ற அழகியை பிடித்து வந்து ஹீரோயினாக்கியிருக்கிறார் விஜய். இளவரசியே இறங்கி வந்த மாதிரி இருந்தார் ஏமி. அவர் பேசிய ஆங்கிலமும், சுவையான சூயிங்கமும் ஒன்றாக இருந்ததால், அவரது முகத்தையே பார்த்துக் கொண்டிருந்தோம். வேறென்ன செய்வதாம்?

GIF animations generator gifup.com